Кăçал эпир икĕ сменăпа вăй хутăмăр. Пĕрисем — утă, теприсем — çурла уйăхĕсенче. Шутласан вăхăчĕ нумай та мар пек, анчах эпир мĕн пур вăя пухса тавралăха илем кĕртрĕмĕр теме юрать. Çак тапхăрта Шупашкар — Канаш чукун çул переезчĕ патĕнчен пуçласа Еншик Чуллă çул кукрине çитичченех çÿп-çап пуçтартăмăр, шкул территорине тирпей-илем кĕртрĕмĕр. Çу кунĕсенче эпир мĕн тĕрлĕ чечек лартман, каярах шăварса çум курăкран тасатман пулĕ? Халĕ шкул территорийĕнчи чуна ытарми илемлĕ чечексене пăхма епле кăмăллă.Эпир шкул пахчинче те сахал мар тăрăшнă. Кунти пахча çимĕçсене кунсерен шăварнă. “Черемуха” бригадăра ĕçлекенсем ялсенчи ватă çынсене те пулăшма манман. Вĕсем çакăншăн пире тав тăваççĕ.