Лесничество плансене пурнăçласси çине пысăк тимлĕх уйăрать. Анчах вăрман йĕркине пăхăнманнисем унăн ĕçĕнче пысăк чăрмав кÿреççĕ. Кăçал кăна хирĕçле пулăмсем 2 палăрнă. Пĕрремĕш сăтăрла ĕçĕ 3847 тенкĕлĕх, тепри – 48523 тенкĕлĕх. Вăрман массивĕнче никамран ыйтмасăрах çĕр илнĕ, çавна май тăпра пахалăхне те япăхлатнă. Унсăр пуçне кварталти юпана та сиен кÿрсе хăварнă. Иккĕмĕш хут йĕркене пăсни вара – типĕ йывăçсене саккунсăр майпа касни.

Час-часах вăрмана çуп-çаппа вараласа хăвараççĕ. Сентябрь уйăхĕнче тирпей-илем кÿрессипе уйăхлăх иртрĕ. Йĕркене пăсакансене тупса палăртрăмăр, вĕсене айăпларăмăр.

Вăрман ĕçченĕсене пулăшакансем те сахал мар. Вĕсем – чун-чĕрепе туйса, вăрман ырлăх-пурлăхне ÿстерессишĕн тăрăшаççĕ.

Çут çанталăк тусĕсене çавăншăн пысăк тав. Анчах, палăртрăм ĕнтĕ, вăрмана сиен кÿрекенсем те тупăнаççĕ. Вĕсен тĕллевĕ çапла: «Эпĕ канатăп. Ман хыççăн хуть те мĕнле юлтăр». Кăвайт чĕртеççĕ те сÿнтерме манаççĕ. Çакна кашнин асра тытасчĕ: чăн-чăн вăрмана ÿссе çитĕнме сахалтан та 70 çул кирлĕ. Çавăнпа та çут çанталăка сăтăр тăвар мар.