«Йывăç ларт та ăна пăхса ÿстер» текен каларăша Нĕркеç вăтам шкулĕн вĕренекенĕсемпе педагогĕсем çирĕп пăхăнаççĕ. Вĕсем çулсеренех йывăç-тĕм лартас ĕçе хастар хутшăнаççĕ. Çамрăк вăрман, посадка латрса çитĕнтереççĕ вĕсем. Акă, иртнĕ кунсенче те ачасем хире тухрĕç. Янкасси çывăхĕнче лартнă çамрăк хунавсем вут-кăвара пула сиенленнĕ. Вĕсем вырăнне çĕннисене лартма килĕшсе татăлчĕç те вĕренекенсем. Пĕр кунта вĕсем 1500 йывăç лартса ĕлкĕрчĕç. Ĕç кал-кал пычĕ. Пурте тăрăшса ĕçлерĕмĕр. Ыр ĕç туни те хавхалантарчĕ. Çут çанталăк илемĕпе киленес тесен кашниех йывăç лартса ÿстермелле, ăна вăхăтра пăхса тăмалла. Кайран вăл хăйĕн илемĕпе иртсе çÿрекенсене савăнтарĕ.