Вута сарăлма паман
Хĕрлĕ автан
― Пăшăрханма кирлĕ мар, вăрман çунмасть, ― терĕ патшалăх пушар надзорĕн районти уйрăмĕн пуçлăхĕ Николай Миронов. ― Стадионран инçех мар типĕ курăк хыпса илнĕ. 300 тăваткал метр лаптăкра сÿнтертĕмĕр ăна. Вăрманпа çÿрекен Кÿкеç ял тăрăх çыннисемех 2 сехет çурăра çулăма асăрхаса милицие шăнкăравласа пĕлтерчĕç.Пушар хуралĕн ĕçченĕсем вырăна тухса тÿрех вут аллине парăнтарнă. Кунта иртен-çÿренсем çулăма вăхăтлă асăрханине, малтан хăйсемех сÿнтерме пуçланине те палăртмалла. Ахальлĕн çак шăрăх вăхăтра вăрманта пушар тухас хăрушлăх та пысăк. Паллă мар çын вутпа асăрханмасăр усă курнă ― пушара хирĕç кĕрешекенсем типĕ курăк çунма пуçланин сăлтавне çапла ăнлатараççĕ. Сăмах май, ку вăрманта ăçта тунката пур, унта эрех-сăра савăчĕ йăваланать. Пирус мăкăрлантарса пыра хаяр шĕвекпе чÿхеме юратакансем, шашлык кăмăллакансем тÿрех çакăнта çул тытаççĕ. Тен, сăлтавĕ вĕсенче?... Типĕ курăк çунма пуçланă вырăнта та кăвайт чĕртни курăнать. Шашлык юратакансем унта паян пулнă е урăх кун ― çирĕплетсе калама йывăртарах.
Çынсене вăрмана кĕнĕ çĕрте, шалта йывăçсем çине шашлык пĕçерме, пирус туртма юраманни çинчен калакан хутсем çакни те шухăшлаттармасть пулмалла. Çавăнпах ĕнтĕ ĕнерхи кунтан ку участокра патруль çÿреме пуçларĕ. «Августăн 12-мĕшĕнче çак ушкăна йĕркелерĕмĕр. Участковăй, патшалăх пушар надзорĕн инспекторĕ, патрульпе пост служби кашни кунах вăрманта тĕрĕслев ирттерĕç», ― пĕлтерчĕ Николай Валерьевич.