Ешерĕ йывăç-тĕм
Республикăра «Йывăç ларт тата ăна упра» акци ирттересси йăлана кĕчĕ ĕнтĕ. Çулталăкне икĕ хут - кĕркунне тата çуркунне - йĕркелекен мероприятие районсемпе хуласенче пурăнакансем хастар хутшăнаççĕ.
Пархатарлă шухăша Вăрнарти ял хуçалăх техникумĕнче ĕçлекенсемпе ăс пухакансем те ырласа йышăнаççĕ. Вĕренÿ заведенийĕ территорийĕнче Çĕнтерÿ аллейи йĕркеленĕ вĕсем. Унта йывăç-тĕм лартнипе çеç çырлахмаççĕ, ешĕл тумлăскерсене пăхсах-шăварсах тăраççĕ. Шел, кăçалхи çуллахи шăрăха пула çуркунне лартнă хăш-пĕр йывăç хăрнă. Çавсене студентсем çĕннисемпе улăштараççĕ. Вĕсем хырпа чăрăша, пилеше ытларах кăмăллаççĕ. Нумай чухне вăрман çумĕнче хăй тĕллĕн шăтса çитĕнекен çамрăк йывăçсене кăларса килеççĕ.
Студентсем çуркунне йывăç-тĕм лартнипе çеç çырлахмаççĕ, хăйсене уйăрса панă лаптăка чавса клумбăсем йĕркелеççĕ, чечек акаççĕ. Хитрелĕхĕпе савăнтараканскерсене кĕркуннечченех пăхаççĕ: шăвараççĕ, çум курăкран тасатаççĕ. Çамрăксем Чăваш Енĕмĕр чечекленекен сада аса илтертĕр тесе тăрăшаççĕ.