Пĕрлешнĕ Нацисен Организацийĕн Генеральнăй Ассамблейи 2011 çулта Пĕтĕм тĕнчери вăрмансен çулталăкĕ тесе пĕлтерчĕ. Çавна май районти ачасемпе çамрăксен пултарулăх центрĕ тĕрлĕрен конкурссемпе акцисем ирттерет. Анчахрах, акă, Шупашкарта республикăри 2-мĕш экологи форумĕ иртнĕ. Унта пирĕн районтан Юнтапа шкулĕнчи «Çамрăк вăрманçă» вĕренÿ пĕрлешĕвĕн команди хутшăннă (ертÿçĕ – Эльвира Афанасьева). Форумра «Пирĕн экологи пуçарулăхĕ» çавра сĕтел, «Экологи тата вăрман» викторина йĕркеленĕ, патшалăх тата çут çанталăка сыхлакан органсен представителĕсем вăрмансенчи лару-тăрупа паллаштарнă, çавăн пекех республикăри мероприятисем çинчен калакан чи лайăх ĕçсене палăртнă. Юнтапа шкулĕнчи Ксения Федотовăпа Диана Николаева тата вĕсен ертÿçи Э.Афанасьева «Экоразведка: çÿп-çап ан пултăр!» акцин республикăри наукăпа тĕпчев ĕçĕсен, «Кайăксене сăнанă кунсем» акцин, республикăри экологи форумĕн дипломĕсене çĕнсе илнĕ.