Калининăри шкул ачисем çулсеренех республикăри «Заказника усрава ил» экологи программине хутшăнаççĕ

Вĕсем «Калининский» çут çанталăк заказникне хÿтте илнĕ. «Географи тавра пĕлÿçисем» пĕрлешĕве çÿрекенсем тĕрлĕ экологи мероприятийĕсене хутшăнаççĕ: çÿп-çап пуçтарассипе «Кĕрен сарă перчеткесем» акцисем йĕркелеççĕ, пушартан асăрхаттарассипе листовкăсем сараççĕ, стена хаçачĕсем кăлараççĕ, экологи рейчĕсене тухаççĕ, хĕлле вăрман кайăкĕсене тăрантараççĕ тата ыт.те. Çавăн пекех вĕсем сайра тĕл пулакан ÿсен-тăрансемпе чĕр чунсене тупса палăртаççĕ.

7-мĕш класра вĕренекен Мария Захарова Калининăри вăрман лесничествин 2-мĕш кварталĕнче геоботаника тĕпчевĕ ирттерет. Иртнĕ шăмат кун вăл ун пĕтĕмлетĕвĕсемпе экологи енĕпе республикăри XVIII наукăпа практика конференцийĕнче паллаштарнă, заказникра тунă ĕçсене хÿтĕлерĕ. Маттур хĕрача 1-мĕш вырăн йышăннă.

Çамрăк тавра пĕлÿçĕсем çывăхри территорие час-часах тĕпчеççĕ, вĕсем районти çут çанталăк палăкĕ вырăнĕнче – Йăрар Ишек çырмин айлăмĕнче – авалхи тинĕс «йĕрĕсене» (белемнит тата аммонит) тупни çинчен каласа пачĕç.