https://vk.com/video-105377917_456244503?ref_domain=chgtrk.ru 
Шупашкар тӑрӑхӗнчи Явӑш ялӗнче хӑтлӑлатнӑ ҫӑлкуҫа уҫрӗҫ. Ӑна тирпей-илем кӗртме Вырӑс географи пӗрлешӗвӗпе «Экология» фонд пулӑшнӑ.

Явӑшсем ҫак ҫӑл патне 50 ҫул ытла ӗнтӗ шыв ӑсма ҫӳреҫҫӗ. Ял уявӗсене те кунта ирттереҫҫӗ. Ҫавӑнпа та 2017-мӗш ҫулта Владимир Скворцовпа Юрий Андреев ку вырӑна тирпей-илем кӗртме шутланӑ. Майӗпен ырӑ ӗҫе ыттисем те хутшӑннӑ.

Ял ҫыннисем пуҫарнӑ пархатарлӑ ӗҫрен Вырӑс географи пӗрлешӗвӗ те айккинче юлман. Ҫӑлкуҫа хӑтлӑлатма пулӑшнӑ. «Родники РГО» проект иккӗмӗш ҫул ӗҫлет. Унпа килӗшӳллӗн кӑҫал Раҫҫейӗпе 5 вырӑна иккӗмӗш пурнӑҫ парнеленӗ. Мӗн палӑртнине пурнӑҫа кӗртме укҫан «Экология» фонд пулӑшать. Явӑшсене тӑрӑллӑ сцена ӑсталаса тата тротуар туса панӑ.

Ял халӑхне вырӑнти пуҫлӑхсем те тӗрев парса тӑраҫҫӗ. Шупашкар тӑрӑхӗн ертӳҫи Владимир Михайлов нумаях пулмасть Вырӑс географи пӗрлешӗвӗн пайташӗ пулса тӑнӑ, вырӑнти уйрӑмне уҫнӑ. Явӑш ялӗпе федераци проектне хутшӑниччен, хӑйнееверлӗ экспедици те йӗркеленӗ - округри мӗнпур ҫӑлкуҫа тӗпченӗ.

Ырӑ улшӑнусем явӑшсене усӑллӑ ӗҫсем тума хавхалантараҫҫӗ. Халӑх пуҫарӑвне пурнӑҫа кӗртме пулӑшакан программӑпа килӗшӳллӗн, кӑҫал ҫӑлкуҫ патне илсе ҫитерекен урамра асфальт ҫул сарнӑ. Ҫырмари ҫула вара чулпа ҫирӗплетнӗ. Халӗ ҫӑлкуҫ патне йӗпе-сапара та ҫитме пулать. Сӑмах май, «Родники РГО» проект малалла тӑсӑлать. Апла пулсан ытти муниципалитетсем те унта хутшӑнма пултараҫҫӗ. Кӑмӑл тӑвакансем чылай пулнипе Вырӑс географи пӗрлешӗвӗн Чӑваш Енри уйрӑмӗн хастарӗсем конкурс йӗркелесшӗн. Унӑн ҫӗнтерӳҫисем ҫӗршыв шайне тухма тивӗҫ пулӗҫ.