https://vkvideo.ru/video-105377917_456246739?ref_domain=chgtrk.ru 
Тӑван ҫӗршывӑн Аслӑ вӑрҫинче Совет Союзӗн 27 миллиона яхӑн ҫынни вилнӗ. Вӗсен ячӗсене ӗмӗрлӗхе халӑх асӗнче хӑварас тесе Раҫҫейре кашни ҫулах «Астӑвӑм сачӗ» акци ирттереҫҫӗ. Чӑваш Ен кӑҫал та пархатарлӑ пуҫарӑва хастар хутшӑнчӗ. Регион ертӳҫи Олег Николаев та хӑй ятӗнчен йывӑҫсем лартрӗ.

Пӗлтӗрӗшлӗ ӗҫ-пуҫ Куславкка тӑрӑхӗнче пулса иртрӗ. Куснар ялӗ ҫывӑхӗнчи Сӑрпа Хусан хӳтӗлев чиккине тӑвакансене асӑнса уҫнӑ мемориал комплексӗнчи митинга йышлӑн пухӑннӑ. Пирвай Олег Николаев шкул ачисемпе Пӗтӗм Раҫҫейри акципе килӗшӳллӗн экскурси ирттерчӗ. Музейпа паллаштарнӑ май несӗлсен тылри паттӑрлӑхӗ пирки каласа кӑтартрӗ. «Астӑвӑм садне» те ҫывӑхри уйра чӗртрӗҫ. Аслӑ Ҫӗнтерӗвӗн ҫавраҫулне халалласа 80 хисеп евӗрлӗ чӗрсе тухнӑ суха кассисенче вун-вун ҫултан ҫирӗп хыр вӑрманӗ кашлӗ. Чи малтанах Республика Пуҫлӑхӗ Сталинградри ҫапӑҫу вӑхӑтӗнче ҫӑлӑнса юлнӑ тирек йывӑҫӗнчен ӗрчетсе регионсене валеҫнӗ хунава лартрӗ. 3 пин ҫамрӑк хыр лартса хӑварас ӗҫе вара пысӑк йышпа хутшӑнчӗҫ. Вӑл шутра Правительство пайташӗсем, тӗрлӗ пӗрлешӳ хастарӗсем, шкул ачисем.
Вӑрман хуҫалӑхӗнче ӗҫлекенсем йывӑҫ лартмалли йӗркене аса илтерсех тӑчӗҫ. Ку вырӑн хунавсене аталанма ӑнӑҫлӑ пулнине палӑртрӗҫ.

Чӑваш Ен акцие 6-мӗш хут хутшӑнать. Ҫак хушӑра 400 гектар лаптӑк ҫинче 600 пин ытла ҫамрӑк йывӑҫ вӑй илнӗ. Кӑҫал кашни округра 80 пин хунав лартса хӑварма палӑртнӑ.